سینی و زەرف؛ كۆڕی رەمەزانی نەتەوەكانی كەركوك گەرمدەكات
سینی و زەرف، یارییەكی كەلتوری كۆنە، هەموو شەوانێكی رەمەزان، لە چەند پارێزگایەكی عیراقدا، لە نێویاندا كەركوك، موسڵ و هەولێر بەڕێوەدەچێت، تایبەتمەندی یارییەكە بۆ كەركوك لەوەدایە هەموو نەتەوەكان كۆدەكاتەوە.
لە شاری كەركوك زۆرترین كافێ، یان شوێنی تایبەت تەنیا لە مانگی رەمەزاندا بۆ ئەو یارییە ئامادەدەكرێت. هەرسێ نەتەوە سەرەكییەكەی كەركوك (عەرەب، كورد و توركمان) پێكەوە یارییەكە دەكەن.
كەركوك/ نیسانی 2022/ یاری سینی و زەرف، ئەو یارییەی لە شەوانی رەمەزاندا كۆڕی نەتەوەكان گەرمدەكات. فۆتۆ: كەركوك ناو
یارییەكە، پێكدێت لە سینییەك و 11 زەرف (فنجانی مس)، لەگەڵ بونجوقێك (زار)، هەروەها بڕێك لوقم كە لێواری سینییەكەی پێ دادەپۆشرێت، تا بتوانرێت فنجانەكان بەشێوەیەكی باش لەسەر سینییەكە جێگیربكرێت.
زارەكە لەناو یەکێک لە زەرفەکاندا دەشاردرێتەوە و ئامادە دەکرێت بۆ یاریکردن، ئەو تیمە براوە دەبێت كە بزانێت زارەكە لەناو كام لە فنجانەكان شاردراوەتەوە.
یارییەکە لە نێوان دوو تیمی سێ کەسی، یان چوار کەسی دەبێت.
پارچە قوماشێک یاخود بەتانییەک بەکاردێت بۆ دروستکردنی بەربەست لە نێوان تیمەکان، تا ئەوكاتەی زارەكە لەناو یەكێك لە فنجانەكاندا دەشاردرێتەوە. بۆ ئەوەی تیمی بەرامبەر نەزانێت زارەكە لەكام فنجاندایە.
