شەبەك، كریستیانیی و ئێزیدی
ناڕەزاییەكانیان دەگەیەننە نەتەوە یەكگرتووەكان

دهۆك، 2019، بنكه‌یه‌كی ده‌رهێنان و نوێكردنه‌وه‌ی تۆماری بایۆمه‌تری ده‌نگدان له‌ كه‌مپی ئاواره‌كانی شاریا فۆتۆ: یونامی

عەمار عەزیز – نەینەوا

نوێنەری هەرسێ پێكهاتەی شەبەك، كریستیانیی و ئێزیدی لە ئەنجومەنی پارێزگای نەینەوا، ناڕەزاییەكانیان لەبارەی یاسای هەڵبژاردنی ئەنجومەنی پارێزگاكانی عیراق دەگەیەننە نەتەوە یەكگرتووەكان و داوا دەكەن بڕگەیەكی ماددەكە هەڵبوەشێتەوە.

نوێنەری ئەو سێ پێكهاتەیە و سەرۆكی ئەنجومەنی پارێزگای نەینەوا، یەكشەممە 8ی ئەیلول، لە كۆبونەوەیەكیاندا لەگەڵ نوێنەری نەتەوە یەكگرتووەكان لە بەغدا، پرسی هەڵبژاردنی داهاتوی ئەنجومەنی پارێزگاكانیان تاوتوێكرد. لە نێویاندا دەنگدانی ئاوارەكان و كورسی كۆتای كەمینەكان.

غه‌زوان داودی، نوێنه‌ری کۆتای شه‌به‌ک له‌ ئه‌نجومه‌نی پارێزگای نه‌ینه‌وا و بەشداربوی كۆبونەوەكە، به‌ (که‌رکوک ناو)ی وت "كۆبونەوەكە لەسەر بابه‌تی ده‌نگدانی ئاواره‌کان و راستکردنه‌وه‌ی بڕگه‌ی 16ی یاسای هه‌ڵبژاردنەكان بوو، ئێمە ناڕەزایی خۆمان گەیاندە نوێنەری نەتەوە یەكگرتووەكان و داوامان لێکردن‌ فشار لەسه‌ر لایه‌نه‌ په‌یوه‌ندیداره‌کان بکه‌ن بۆ گۆڕینی ئەو بڕگەیە".

به‌پێی هه‌مواری یاسای هه‌ڵبژاردنی ئه‌نجومه‌نی پارێزگاکانی عیراق، که‌ په‌رله‌مان له‌ ته‌مموزی ئه‌مساڵدا په‌سه‌ندی کرد، ئاواره‌ ناوخۆییه‌کان پێویسته‌ له‌ بازنه‌ی هه‌ڵبژاردنی شوێنی راسته‌قینه‌ی خۆیاندا ده‌نگبده‌ن، ئه‌وه‌ش له‌رێی کارتی بایۆمه‌ترییه‌وه‌ و بەپێی بڕگەی 16ی یاسای هەڵبژاردنەكان.

له‌ پارێزگاكانی هه‌رێمی كوردستان، زیاتر له‌ 700 هه‌زار ئاواره‌ هه‌یه‌ و به‌پێی هه‌مواری یاسای هه‌ڵبژاردن، پێویسته‌ ئه‌وانه‌ی مافی ده‌نگدانیان بگه‌ڕێنه‌وه‌ زێدی خۆیان و له‌وێ به‌شداری پرۆسه‌كه‌ بكه‌ن، ئه‌وه‌ش ناڕه‌زایی لێكه‌وتۆته‌وه‌ به‌وپێیه‌ی زۆرینه‌ ئاماده‌ی گه‌ڕانه‌وه‌ نین.

ئەو سێ پێكهاتەیە پێیانوایە ئەو بڕگەیە زیانی دەبێت بۆ سەر دەنگەكانیان، بەهۆی ئەوەی ئاوارەكان لەبەر مەترسی لەسەر ژیانیان و نەبونی خزمەتگوزاری لە ناوچەكانیان ناتوانن بگەڕێنەوە زێدی خۆیان.

غەزوان کۆبونه‌وه‌كەی بە  "زۆر گرنگ" وەسفكرد و وتی "نوێنەری نەتەوە یەكگرتوەكان وتیان پێشئەوەی یاساكە له ‌په‌رله‌مانی عیراق ده‌ربچێت، زۆر هه‌وڵماندا ئه‌و بڕگه‌یه‌ په‌سند نه‌کرێت، به‌ڵام له‌به‌ر هۆکاری سیاسیی و چه‌ند فشارێکی ده‌ره‌وه‌ به‌داخه‌وه‌ ئه‌و بڕگه‌یه‌ په‌سند کرا".

زیاتر وتی "ئێستاش بەڵێنیانداوە بە هەموو شێوەیەك كاربكەن لەپێناو رادەستكردنەوەی یاساكە".

بەپێی ئەو بڕگەیەی یاساكە، چاوەڕواندەكرێت ئاوارەیەكی زۆر بێبەشبن لە دەنگدان، ئەوەش بەلای نەتەوە یەكگرتووەكانەوە جێی مەترسییە، وەك غەزوان وتی.

بڕیارە لە 16ی ئەم مانگە، دادگای فیدراڵی عیراق، بڕیاری كۆتایی لەسەر ئەو ماددەیە بدات، ئەوەش دوای ئەوەی ئەو سێ پێكهاتەیە سكاڵایان تۆماركرد.

غه‌زوان وتی "ئه‌گه‌ر وەڵامی دادگای فیدراڵی بەدڵی ئێمە نەبوو، ئەوا هەوڵی تر دەدەین".

  • FB
  • Instagram
  • Twitter
  • YT