پەرستگای لالش بەڕوی زیارەتكاراندا دەكرێتەوە

شێخان/26ی ئابی 2020/ دوای پێنج مانگ لە داخستنی، دەرگای پەرستگای لالش بە فەرمی بەڕوی زیارەتكاراندا كرایەوە. فۆتۆ: تایبەت بە كەركوك ناو

عەمار عەزیز - نەینەوا

پەرستگای لالش-ی ئێزیدییەكان بەڕوی سەردانیكەراندا كرایەوە و تەنیا ئەمڕۆ هەینی، نزیكەی هەزار كەس چونەتە ناو پەرستگاكەوە.

كردنەوەی پەرستگاكە دوای پێنج مانگ دێت لە داخستنی بە بڕیاری حكومەت، ئەوەش بەهۆی رێگریكردن لە تەشەنەسەندن و بڵاوبونەوەی ڤایرۆسی كۆرۆنا.

لوقمان مەحمود، لێپرسراوی راگەیاندنی پەرستگای لالش بە (کەرکوک ناو)ی وت "ماوەی سێ روژە بەشێوەیەکی فەرمی دەرگای پەرستگای لالش بەڕوی زیارەتکاران و میوانانی ناوخۆ و بیاندا کراوەتەوە".

لوقمان جەختیكردەوە لەوەی ئێستا هەموو كەسێك دەتوانێت سەردانی پەرستگاكە بكات، بەڵام بە جێبەجێكردنی رێنماییە تەندروستییەكان.

ئەو وتی "رێنماییەكان بۆ سەلامەتی هەموو لایەكە... تەنیا ئەمڕۆ هەینی نزیكەی هەزار سەردانیكەر چونەتە ناو پەرستگاكەوە".

lalsh-3
شێخان/26ی ئابی 2020/ دوو هاوڵاتی ئێزیدی لە پەرستگای لالش، دوای ئەوەی بە فەرمی كرایەوە فۆتۆ: تایبەت بە كەركوك ناو

پەرستگای لالش، دەکەوێتە سنوری قەزای شێخان لە پارێزگای نەینەوا و بە پیرۆزترین شوێنی ئایینی ئێزیدی دادەنرێت لە عیراق و جیهاندا.

لەگەڵ بڕیاری قەدەغەی هاتوچۆ لە ناوەڕاستی ئازاری رابردوو، ته‌واوی مزگه‌وت، كڵێسا، په‌رستگا و شوێنه‌ ئاینییه‌كانی تر له‌ عیراق و هه‌رێمی كوردستان به‌ڕوی نوێژخوێنان و زیاره‌تكارانیاندا داخراون، به‌ ئامانجی خۆپارێزی و رێگری له‌ بڵاوبونه‌وه‌ی زیاتری ڤایرۆسی كۆرۆنا.

  • FB
  • Instagram
  • Twitter
  • YT