680 خانوو له‌ موسڵی كۆن نۆژه‌نده‌كرێنه‌وه‌

نه‌ینه‌وا، 2019، پرۆسه‌ی پاككردنه‌وه‌ و نۆژه‌نكردنه‌وه‌ی شه‌قام و گه‌ڕه‌كه‌كانی به‌ری راستی موسڵ فۆتۆ: راگه‌یاندنی قایمقامیه‌ت

كه‌ركوك ناو – موسڵ

مه‌نسور مه‌رعید، پارێزگاری نه‌ینه‌وا ده‌ستپێكردنی پرۆژه‌یه‌كی راگه‌یاند بۆ نۆژه‌نكردنه‌وه‌ی 680 خانوو له‌ موسڵی كۆن، ئه‌وه‌ش له‌چوارچێوه‌ی هه‌وڵه‌كانی دوباره‌ گه‌ڕانه‌وه‌ی ژیانی ئاسایی، كه‌ ئاشته‌وایی كۆمه‌ڵایه‌تی و سڕینه‌وه‌ی پاشماوه‌ی شه‌ڕ به‌شێكی سه‌ره‌كییه‌تی.

ئه‌و هه‌نگاوه‌ی ئیداره‌ی ناوخۆیی نه‌ینه‌وا، دوابه‌دوای ناڕه‌زایی خه‌ڵكی موسڵی كۆن و ناوچه‌كانی تری به‌ری راستی موسڵ هات دژی مانه‌وه‌ی پاشماوه‌ی شه‌ڕ و داروپه‌ردوی خانوه‌ روخاوه‌كان، كه‌ به‌پێی راپۆرتێكی (كه‌ركوك ناو) به‌ربه‌ستێكی گه‌وره‌یه‌ له‌به‌رده‌م گه‌ڕانه‌وه‌ی خه‌ڵكدا.

مه‌نسور مه‌رعید به‌ (كه‌ركوك ناو)ی وت "كادیرانی ئه‌ندازیاری و هونه‌ری له‌ شاره‌وانی نه‌ینه‌وا به‌ هه‌ماهه‌نگی كۆمپانیاكانی فاو و سه‌عد ده‌ستیانكردووه‌ به‌ دوباره‌ بنیاتنانه‌وه‌ و نۆژه‌نكردنه‌وه‌ی 680 خانووی زیانلێكه‌وتوو".

به‌پێی به‌دواداچونه‌كانی شاره‌وانی، رێژه‌ی وێرانكاری له‌ شاری كۆن ده‌گاته‌ سه‌دا 90، به‌شێكی زۆریش له‌و روبه‌ره‌ی خاپور بووه‌، به‌ ئه‌سته‌می ده‌زانن وه‌ك پێشتر و باری سروشتییه‌كه‌ی خۆی لێبكرێته‌وه‌.

پێشتریش نه‌ته‌وه‌ یه‌كگرتوه‌كان ئاشكرایكرد زیاتر له‌ 21 هه‌زار خانوو له‌ شاری موسڵ زیانی به‌ركه‌وتووه‌ یان به‌ ته‌واوی وێران بون.

پارێزگاری نه‌ینه‌وا ده‌ڵێت ماوه‌ی ته‌واوكردنی پرۆژه‌ی نۆژه‌نكردنه‌وه‌ی خانووه‌كان ده‌وروبه‌ری هه‌شت مانگ ده‌خایه‌نێت، چه‌ند قۆناغێكی تری پرۆسه‌كه‌ به‌رده‌وامی ده‌بێت و شوێنی تری به‌ری راستی موسڵ ده‌گرێته‌وه‌، له‌گه‌ڵ پاككردنه‌وه‌ی شار له‌ داروپه‌ردوی خانووه‌ روخاوه‌كان و گه‌ڕانه‌وه‌ی ئاواره‌كان.

منصور_المرعيد
مه‌نسور مه‌رعید، پارێزگاری نه‌ینه‌وا فۆتۆ: راگه‌یاندنی پارێزگا

شه‌ڕ و ئاڵۆزییه‌كانی موسڵ، هه‌زاران خێزانی ئه‌و شاره‌ی ئاواره‌ كرد، به‌هۆی نه‌بونی خزمه‌تگوزاریی و وێرانكاریی و نه‌بونی سه‌قامگیری ته‌واوه‌تی ئه‌منیه‌وه‌، هێشتا به‌شێكی زۆر له‌ دانیشتوانی به‌ری راست نه‌گه‌ڕاونه‌ته‌وه‌ و له‌ كه‌مپه‌كاندا ده‌ژین.

"نه‌ینه‌وا پێویستی به‌ بودجه‌ و ئاشته‌وایی كۆمه‌ڵایه‌تی هه‌یه‌ به‌ هه‌ماهه‌نگی له‌گه‌ڵ رێكخراوه‌ نێوده‌وڵه‌تیه‌كان و كۆمه‌ڵگه‌ی مه‌ده‌نی له‌ پێناو هه‌نگاونان به‌ره‌و ئاوه‌دانی و بنیاتنانه‌وه‌" به‌وته‌ی مه‌رعید.

هه‌روه‌ها رونیكرده‌وه‌ كه‌ ئیداره‌ی نه‌ینه‌وا كارده‌كات بۆ دۆزینه‌وه‌ی چاره‌سه‌ری گونجاو بۆ ئه‌و خێزانانه‌ی یه‌كێك له‌ ئه‌ندامه‌كانیان لایه‌نگری داعش بوه‌، ئه‌وه‌ش به‌ هه‌ماهه‌نگی له‌گه‌ڵ لایه‌نی په‌یوه‌ندیدار، جگه‌ له‌ هه‌وڵدان بۆ گه‌ڕانه‌وه‌ی ئه‌و خێزانانه‌ی له‌ كه‌مپه‌كاندا ماونه‌ته‌وه‌.

مه‌نسور مه‌رعید وتی "نه‌ینه‌وا عیراقی بچوككراوه‌یه‌ كه‌ نه‌ته‌وه‌ و مه‌زهه‌ب و پێكهاته‌ی ئایینی جیاواز له‌ خۆده‌گرێت، هه‌ر ئه‌وه‌ش جیای ده‌كاته‌وه‌ له‌ پارێزگاكانی تر، بۆیه‌ به‌رپرسیارێتی ئێمه‌یه‌ پارێزگاری له‌و شیرازه‌یه‌ كۆمه‌ڵایه‌تییه‌ بكه‌ین و په‌یوه‌ندییه‌كان دروستبكه‌ینه‌وه‌ له‌ نێوان هاوڵاتیاندا".

هه‌رچه‌ند پێشتر هه‌ڵمه‌تی پاككردنه‌وه‌ی شار له‌ پاشماوه‌ی شه‌ڕ هه‌بووه‌، به‌ڵام ئه‌و پرۆسه‌یه‌ به‌رده‌وامی نه‌بووه‌ و هێشتا به‌ تێپه‌ڕبون به‌ ناوچه‌ی كۆندا، به‌ ئاسانی وێرانكارییه‌كان ده‌بینرێن و له‌ زۆر شوێنیشدا بونه‌ته‌ به‌ربه‌ست له‌به‌رده‌م گه‌ڕانه‌وه‌ی خه‌ڵكدا.

تیمه‌كانی شاره‌وانی و ئیداره‌ی نه‌ینه‌وا، چه‌ند رۆژێكه‌ پاككردنه‌وه‌ی شاریان ده‌ستپێكردوه‌ بۆ قیرتاوكردنه‌وه‌ی شه‌قام و نۆژه‌نكردنه‌وه‌ی رێگه‌وبانه‌ سه‌ره‌كییه‌كان.

زوهێر ئه‌عره‌جی، قایمقامی ناوه‌ندی موسڵ پێشتر به‌ (كه‌ركوك ناو)ی وت "پاشماوه‌ی شه‌ڕ به‌ تایبه‌ت له‌به‌ری راستی موسڵ زۆره‌ و كاركردنی به‌رده‌وامی ده‌وێت تا پاكبكرێنه‌وه‌، ئه‌وه‌ش رۆڵی گرنگی ده‌بێت له‌ هاندانی كۆمپانیاكانی وه‌به‌رهێنان تا بێنه‌ پێشه‌وه‌ و پرۆژه‌ی ئاوه‌دانی پێشكه‌شبكه‌ن".

شاری موسڵ، ناوه‌ندی پارێزگاری نه‌ینه‌وا له‌ ته‌مموزی 2017دا له‌سه‌ر ده‌ستی هێزه‌ عیراقییه‌كان كۆنتڕۆڵكرایه‌وه‌، دوای ئه‌وه‌ی له‌ حوزه‌یرانی 2014دا داعش ده‌ستیبه‌سه‌رداگرت.

  • FB
  • Instagram
  • Twitter
  • YT