بەرەی عەرەبی یەكگرتوو داوای دورخستنەوەی راكان جبوری دەكات لە پۆستی پارێزگاری كەركوك

كەركوك/تەمموزی 2019/ كۆنگرەی بەرەی عەرەبی/ وەسفی عاسی، سەرۆكی بەرەكە و كەسایەتی دیاری عەشیرەتی عوبەید لای راستی وێنەكەیە. فۆتۆ: كاروان سلحی

كەركوك ناو

بەرەی عەرەبی یەكگرتوو، داوا لە سەرۆك وەزیرانی عیراق دەكات راكان سەعید، پارێزگاری بەوەكالەتی كەركوك لە پۆستەكەی دوربخاتەوە، ئەوەش بەهۆی "كەمتەرخەمیی و بەكارهێنانی پۆستەكەی" بۆ بەرژەوەندی خۆی و حزبەكەی.

ئەو بەرەیە كە لە سەرەتای ساڵی رابردوو لەلایەن كۆمەڵێك حزب و لایەنی عەرەبی كەركوك و ژمارەیەك هۆز و عەشیرەت پێكهێنرا، ئەمڕۆ یەكشەممە 31ی ئایار لە بەیاننامەیەكدا ئەو داواكارییەیان خستە بەردەم مستەفا كازمی، سەرۆك وەزیرانی عیراق و داوای دانانی پارێزگارێكی بێلایەن دەكەن كە ئینتیمای بۆ هیچ حزبێك نەبێت و بەیەك مەودا لەهەموو پێكهاتەكانەوە نزیكبێت. لەگەڵئەوەشدا بۆی نەبێت لە هەڵبژاردنی داهاتودا بەشداریی بكات تا پۆستەكەی بۆ ئەو مەبەستە بەكارنەهێنێت.

"ئەم داواكارییە لەپێناو پاراستنی دەستكەوتەكانی پلانی سەپاندنی یاسا و بەهۆی گەیشتنە بە هێڵی سور، چونكە هاوڵاتیانی عەرەبی و كەركوك كەوتونەتە بەردەم هەڕەشە"، هەر لەبەیاننامەكەدا هاتووە "پارێزگاكەش گومانی زۆری گەندەڵی لەسەرە و چەندین داوا هەیە لە دەستەی نەزاهە".

ئەم داواكارییە لەپێناو پاراستنی دەستكەوتەكانی پلانی سەپاندنی یاسا و بەهۆی گەیشتنە بە هێڵی سور

بەرەی عەرەبی كە وەكو نەیاری ئەنجومەنی عەرەبی كەركوك دەبینرێت – ئەمەی دواییان راكان سەعید سەرۆكایەتی دەكات-، دەڵێت "ئیدارەدان بۆتە شەخسیی و بەبێ هیچ پلانێك خەڵكی بەتوانا دەسڕدرێتەوە"، هەروەها هاتووە "هیچ پلانێك نییە بۆ پڕۆژە ستراتیژیییەكانی وەك نەخۆشخانە، كارەبا، ئاو، ئاوەڕۆ و نیشتەجێكردن".

rakan-6
راكان سه‌عید جبوری، پارێزگاری كه‌ركوك به‌ وه‌كاله‌ت فۆتۆ: په‌یجی ناوبراو له‌ فه‌یسبوك

 

بەرەی عەرەبی ئەو كەمتەرخەمییانە دەخاتە ئەستۆی راكان سەعید، پارێزگاری كەركوك بەوەكالەت و دەڵێت "بەرپرسە لەو پەرتەوازەییەی كە پێكهاتەی عەرەب تێیكەوتووە و دەستیگرتووە بەسەر مافەكانیاندا، پۆستەكان بۆ عەشیرەت و كەسانی نزیك لە خۆی دادەنێت. كەسانی عەرەبی بەتوانا لادەدات كە دڵسۆزییان بۆ ئەم و حزبەكەی نییە و یاریی بە شایستە و توانای پارێزگاكە دەكەن".

هەروەها راكان سەعید تۆمەتبار دەكەن بەوەی بەرپرسیارێتی یەكەمی ئەو باردۆخەی لە ئەستۆدایە كە نوسینگەی كەركوكی كۆمسیۆنی هەڵبژاردنەكانی تێكەوتووە و تیایدا هاتووە "شایستەی پێكهاتەی عەرەب لە كۆمسیۆن لەبەرچاونەگیراوە و ئەو بەرپرسی یەكەمە لەو بابەتە... كەمتەرخەمیی و كەموكورتی بەئەنقەست هەیە و لەگەڵ بەغدا و ئەنجومەنی كۆمسیاران لەسەر هێڵ نەبووە بۆ چاودێریكردنی ئەو دۆسیەیە تا بڕیارەكە دەرچووە".

شایستەی پێكهاتەی عەرەب لە كۆمسیۆن لەبەرچاونەگیراوە و ئەو بەرپرسی یەكەمە لەو بابەتە

لە 23ی ئایار، كۆمسیۆنی باڵای سه‌ربه‌خۆی هه‌ڵبژاردنه‌كان، كۆمەڵێك گۆڕانكاریی كرد بۆ داڕشتنه‌وه‌ی هه‌یكه‌لیه‌تی نوسینگه‌ی كه‌ركوك، له‌ دانانی به‌ڕێوه‌به‌ر و لێپرسراوی نوێی به‌شه‌كاندا، ئەوەش ناڕه‌زایی لایه‌نه‌كانی عه‌ره‌ب و توركمانی لێكه‌وتەوە.

هەفتەی پێشوش، حزبی توركمان ئیلی، بەهەمان شێوە داوای دورخستنەوەی راكان سەعید و دانانی كەسێكی توركمانی كرد لە پۆستی پارێزگار و ناوبراویان بە "كەمتەرخەم و ئیدارەیەكی گەندەڵ" تۆمەتبار كرد.

  • FB
  • Instagram
  • Twitter
  • YT