ناوم فوئاد ئەلیاس ئێزدۆ (21 ساڵ)ـم، كارو كاسبی من لەو كاتانەدایە كارەبای نیشتمانیی باش نییە، چونكە مۆلیدە چاكدەكەمەوە.
من لە شنگالەوە ئاوارە بوم و وا هەشت ساڵە لە كەمپی شاریای دهۆك نیشتەجێم، نزیكەی چوار ساڵە دوكانێكی چاككردنەوەی مۆلیدەی بچوكی كارەبام داناوە و ئەو پیشەیەشم لە باوكمەوە ببۆ ماوەتەوە.
كارەبا باش نییە، بۆیە خەڵك مۆلیدەی بچوك بەكاردەهێنن و منیش رۆژانە سێ بۆ چوار مۆلیدەم بۆ دەهێنن، لە كەمپی شاریا و كەمپەكانی دیكەی ئاوارەییەوە، هەندێكجار خەڵكی كۆمەڵگەی شاریاش روو لە دوكانەكەی من دەكەن.
مۆلیدەی ئێستا بەهۆی بەنزین و پارچەی خراپەوە زوو زوو لەكاردەكەون.
لە چاككردنەوەی مۆلیدەدا رۆژانە 30 تا 35 هەزار دینارم دەستدەكەوێت و زۆرجار هەر هاوڵاتییەك لە هەفتەیەكدا جارێكیتر مۆلیدەكەی لەكاربكەوێتەوە لەسەر هەمان پارەی یەكەمجار بۆی چاكدەكەمەوە، چونكە ئێمە ئاوارەین و دەبێت دەستی هاوكاری بۆ یەكتری درێژ بكەین.
لە عیراق كێشەی بێ كارەبایی درێژخایەنە، بۆیە پیشەكەی ئێمەش بەردەوامدەبێت.
