ئۆپەراسیۆنێكی فراوان؛ لە سەڵاحەدینەوە بۆ رۆژئاوای كەركوك

ئۆپەراسیۆنێكی هێزە ئەمنییەكانی عیراق، لە ناوچەكانی جێناكۆك فۆتۆ: شانەی راگەیاندنی جەنگی

لەیلا ئەحمەد – سەڵاحەدین

هێزە عیراقییەكان لە چەند قۆڵێكەوە ئۆپەراسیۆنێكی فراوانیان دەستیپێكردووە، بە ئامانجی دەستگیركردنی داواكراوان و نەهێشتنی پاشماوە و مۆڵگەكانی داعش. ئۆپەراسیۆنەكە بەشێكی پارێزگای سەڵاحەدین دەگرێتەوە و بڕیارە تا رۆژئاوای كەركوك بەردەوامی هەبێت.

ئەو ئۆپەراسیۆنە بەشێكە لە قۆناغی هەشتەمی "ئیرادەی سەركەوتن"، بەرەبەیانی ئەمڕۆ یەكشەممە 29ی كانونی یەكەم، لە سێ قۆڵەوە لە قەزای دوزخورماتوو و بەرزاییەكانی چیای حەمرین دەستیپێكردووە و بەرەو باشوری كەركوك و لەوێوە بۆ رۆژئاوای هەمان پارێزگا.

فراس زوبەیدى، وتەبێژى هێزەكانی بەرپەرچدانەوەى خێرا لە قەزای دوزخورماتوو، بە (كەركوك ناو)ی وت "لە سنوری قەزای دوزخورماتوو، ئۆپەراسیۆنەكە لە سێ قۆڵەوە بەڕێوەدەچێت و بڕیارە 72 كاتژمێر بخایەنێت، ئامانج لێی دۆزینەوەی پاشماوەكانی داعش و لەناوبردنیانە".

وتیشی "لەسنوری دوزخورماتوو تەنیا هێزەكانی ئێمە بەشدارییان كردووە، بڕیارە ئۆپەراسیۆنەكە حەوزەى حەمرین، ناوچەى زەرگەو ئامرلی بگرێتەوە".

فراس وتی "ئەم ناوچانە سەختن و هەموى ناوچەى شاخاویی و چۆڵن، شوێنی لەبارن بۆ خۆحەشاردانی چەكدارانی داعش، بۆیە هێرش و شەڕكردن تیایاندا ئاسان نییە".

بەپێی راگەیەنراوێكی شانەی راگەیاندنی جەنگی، ئۆپەراسیۆنەكان لە پێنج قۆڵەوە و بە پاڵپشتی فڕۆکە جەنگییەکانی هێزی ئاسمانی، هاوپەیمانی نێودەوڵەتی و سوپا، لەگەڵ پۆلیسی فیدراڵیی بە سەرپەرشتی فەرماندەیی ئۆپەراسیۆنە هاوبەشەکان بەڕێوەدەچێت.

ئۆپەراسیۆنەكە بەگشتی لە قۆڵی نەینەوا، دیالە و سەڵاحەدین تا لە رۆژانی داهاتودا دەگاتە رۆژئاوای كەركوك بەڕێوەدەچێت.

ئەو ئۆپەراسیۆنە فراوانە كە چەند رۆژێكە ئامادەكاریی بۆ دەكرێت، هاوكات لەگەڵ زنجیرەیەك هێرش و پەلاماردان بۆ سەر هێزە ئەمنییەكان، كێڵگەكانی نەوت و دواترینیان هێرشی سەر سەربازگەی كەی وەن لە هەینی رابردوو.

  • FB
  • Instagram
  • Twitter
  • YT