دوو خۆپیشاندان لە كەركوكەوە
مامۆستایانی كورد بینینی كازمییان دەوێت و توركمان پشكی زیاتر لە دامەزراندن

كەركوك/ 22ی ئەیلولی 2020/ خۆپیشاندانی مامۆستایانی خوێندنی كوردی لە كەركوك فۆتۆ: سۆران

کەرکوك

لە ماوەی كەمتر لە كاتژمێرێكدا بەردەم پەروەردەی كەركوك دوو خۆپیشاندانی جیاوازی دوو نەتەوەی بەخۆوەبینی، بەشێك لە مامۆستایانی خوێندنی كوردی داوای بینینی مستەفا كازمی، سەرۆك وەزیران و ژمارەیەك لە هاوڵاتیانی توركمانیش داوای پشكی دامەزراندنی زیاتریان كرد.

ئەو دوو خۆپیشاندانە ئەمڕۆ سێشەممە 22ی ئەیلول بەڕێوەچون، بەبێ ئەوەی هیچ كەسێك لە پەروەردە و لایەنی پەیوەندیدار بە تەنگ داواكارییەكانیانەوە بێن.

هاوڵاتیانی توركمان، لە خۆپیشاندانەكەدا جەختیانكردەوە لەوەی پشكی توركمان لە دامەزراندنەكەی پەروەردەی كەركوك كەمە و رەچاوی رێژەی توركمان لە پارێزگاكە نەكراوە. لەگەڵئەوەشدا داوایانكرد خانەوادەی كەسوكاری "شەهیدان"ی توركمان پشكیان هەبێت.

ڤیدیۆ: خۆپیشاندانی بەشێك لە توركمانەكانی كەركوك لەبەردەم پەروەردە
وەزارەتی پەروەردەی عیراق لە سەرەتای ئەمساڵ لیستی دامەزراوانی سەر بە میلاكی وەزارەت راگەیاند و تیایدا پشكی شێر بەر نەتەوەی عەرەب كەوت، بەپێی لیسته‌كه‌ لە سه‌دا 62ی دامەزرێنراوان بەر پێكهاتەی عەرەب كەوتون، زیاتر له‌ سه‌دا 20 بۆ كورد، زیاتر له‌ سه‌دا 17 بۆ توركمان، هەریەكە لە كریستیان و كوردی فەیلیش كەمتر لەسەدا یەكیان به‌ركه‌وتووە.

لە خۆپیشاندانی دووەمدا، بۆ جاری پێنجەم دەستەی مامۆستایان و فەرمانبەرانی ناڕازی سەر بە خوێندنی كوردی، داوایانكرد مستەفا كازمی، سەرۆك وەزیرانی عیراق ببینن، ئەوەش بۆ ئەوەی روبەڕو داواكارییەكانیان وەربگرێت.

داواكارییەكانیان جەختكردنەوەیە لە گواستنەوەی راژەكانیان لە حكومەتی هەرێمی كوردستانەوە بۆ حكومەتی فیدراڵی.

سەلام عەزیز، سەرپەرشتیاری دەستەکە بۆ (کەرکوک ناو)، وتی "داوای بینی سەرۆک وەزیرانی عیراق دەکەین بۆ ئەوەی بە راستەوخۆ بڵێین ئێمە کەرکوکین و خزمەت بەم شارە دەکەین، بەڵام موچەكەمان لای هەرێمە و نەیدات". زیاتر وتی "دەمانەوێت وەكو بەشی توركمانی و عەرەبی مامەڵە لەگەڵ خوێندنی كوردی بكرێت".

مامۆستایانی خوێندنی كوردی داوای گواستنەوەی راژەكانیان دەكەن بۆ سەر حكومەتی عیراق

زیاتر لە هەشت هەزار مامۆستای خوێندنی كوردی لە كەركوك و ناوچەكانی تری جێناكۆك، راژەكانیان لەسەر حكومەتی هەرێمە و لەو ناوچانە وانەدەڵێنەوە كە لەژێر دەستی حكومەتی عیراقدایە.

"ئێمە ئەگەر لەوە زیاتر پەراوێزبخرێن و وەڵامی داوکارییەکانمان نەدەنەوە، ئەوا دەچینە بەردەم ئەنجومەنی وەزیران لە بەغدا خۆپیشاندان دەکەین"، سەلام عەزیز وایوت.

هەر لە گردبونەوەکەدا دلڤان ئەکرەم بە ناوی مامۆستایان ناڕازییەوە بەیاننامەیەکی خوێندەوە و تیایدا جەختیكردەوە "داوا لە هەر سێ سەرۆکایەتییەکەی عیراق دەکەین بەدەم داواکارییەکانمانەوە بێن، ئێمە داوای مافی ئاسایی خۆمان دەکەین کە موچەیە".

  • FB
  • Instagram
  • Twitter
  • YT