لە كامێراكانی چاودێریدا دەركەوتون
دوو گەنج "ئاڵای داعش" لە شۆریجەی كەركوك هەڵدەكەن

كەركوك/ 8ـی كانونی یەكەمی 2021/ لە بینایەكی تەواونەكراوی خوێندنگەدا دوو پەڕۆی رەشی هاوشێوەی ئاڵای داعش هەڵدەواسرێن فۆتۆ: كەركوك ناو

كەركوك ناو – كەركوك

دوو پەڕۆی رەشی هاوشێوەی ئاڵای داعش، لە باڵەخانەیەكی تەواونەكراوی گەڕەكی شۆریجەی كەركوك هەڵدەكەن و بەپێی لێكۆڵینەوە سەرەتاییەكان؛ دوو گەنج لەكامێراكانی چاودێریدا دەردەكەون و دواتر هەڵدێن.

بەیانی ئەمڕۆ چوارشەممە 8ـی كانونی یەكەمی 2021 دانیشتوانی رەشیدئاوای گەڕەكی شۆریجە، هێزە ئەمنییەكانیان لە هەڵكردنی ئاڵای داعش ئاگاداركردۆتەوە، ئەوەش لەناو بینای تەواونەكراوی خوێندنگەدا.

بەڵێن فەتاح، دانیشتوی ئەو گەڕەكە و نزیك لە شوێنی روداوەكە بە (كەركوك ناو)ـی وت "هەر بەیانی زوو هێزی ئەمنی ئەم ناوچەیەی گرت و وتیان لە دوو شوێنی جیاوازی بیناكەدا ئاڵای داعش هەڵكراوە، یەكێكیان لەناو پەنجەرەی خوێندنگە تەواونەكراوەكە و ئەویتریش لەسەر بلۆكەكان بووە".

هەر لەو باڵەخانەیەدا كیسەیەكی بەتاڵ دانراوە و هێزە ئەمنییەكان لەبەر مەترسی بۆمبی چێنراو لەڕێی تیمی پسپۆڕی پوچەڵكردنەوەی تەقەمەنییەوە كیسەكەیان هەڵگرتۆتەوە.

ala shorija (2)
كەركوك/ 8ـی كانونی یەكەمی 2021/ ئەو پەڕۆ رەشەی هاوشێوەی ئاڵای داعشە و لە باڵەخانە تەواونەكراوەكەی گەڕەكی شۆریجە هەڵواسرابوو فۆتۆ: لە تۆڕە كۆمەڵایەتییەكاندا بڵاوبۆتەوە

"ئاڵاكە پارچەیەك قوماشی رەش بوون، بە خەتێكی ناشرین دروشم و لۆگۆكەی ئاڵاكەی داعشی لەسەر كرابوو" بەوتەی بەڵێن كە پێیوایە ئەو روداوە جێی مەترسی و هەڕەشەیەكی راستەوخۆیە بۆ خەڵك.

ئەو باڵەخانەیەی ئاڵاكانی تێدا هەڵكراوە، دەكەوێتە ناوەندی گەڕەكی شۆریجەی كەركوك، لە دەستەراستیەوە خوێندنگەی نێرگز نزیكە، لە بەرامبەریشیدا كۆمیتەی یەكێتیی نیشتمانیی كوردستان و یانەی وەرزشی شۆریجە هەیە بە دوری كەمتر لە 50 مەتر.

سەرچاوەیەكی ئەمنی ئاگادار كە داوایكرد ناوی بڵاونەكرێتەوە بە (كەركوك ناو)ـی وت "لێكۆڵینەوە بەردەوامە و لە كامێراكانی چاودێری یانەی وەرزشی شۆریجە و كۆمیتەی یەكێتی دەركەوتووە كاتژمێر 6:30 خولەكی بەیانی دوو گەنج ئاڵاكان هەڵدەكەن و دەڕۆن".

بەوتەی سەرچاوەكە ئەو دوو گەنجە خەڵكی گەڕەكەكە نین.

هەروەها وتی دوای ئاگاداركردنەوەیان لەلایەن هاوڵاتیانەوە، ئاڵاكانیان بردووە و بەدوای سەرەداوی روداوەكەدا دەگەڕێن.

ala shorija (1)
كەركوك/ 8ـی كانونی یەكەمی 2021/ باڵەخانە تەواونەكراوەكەی رەشیدئاوای گەڕەكی شۆریجە فۆتۆ: كەركوك ناو

ئەوەش لەكاتێكدایە لە دوو هەفتەی رابردودا، چەكدارانی (دەوڵەتی ئیسلامی - داعش) لە چەندین شوێنی پارێزگای كەركوك و ناوچەكانی دیكەی جێناكۆك هێرشەكانیان بۆ سەر هاوڵاتیان و هێزە ئەمنییەكان، بە تایبەت سەنگەرەكانی پێشمەرگە چڕكردۆتەوە.

خانم دەروێش، دانیشتوی گەڕەكی شۆریجە بە (كەركوك ناو)ـی وت هەڵكردنی ئاڵای داعش تەنیا بۆ شڵەژانی هاوڵاتیانە و "كەسانی دەمڕوت ئەو كارە دەكەن تا ترس و دڵەڕاوكێ بخەنە دڵی خەڵكییەوە".

تا ئامادەكردنی ئەم هەواڵە هێزە ئەمنییەكانی كەركوك بە رەسمی هیچ رونكردنەوەیەكیان لەسەر روداوەكە بڵاونەكردۆتەوە.

لە پارێزگای كەركوك پۆلیسی ناوخۆیی، لیوای 61ـی تایبەت، سوپای عیراق، پۆلیسی فیدراڵی و حەشدی شەعبی هەن لە چوارچێوەی ژوری ئۆپەراسیۆنە هاوبەشەكاندا.

  • FB
  • Instagram
  • Twitter
  • YT