بەدواداچونێكی (كەركوك ناو)؛ خەڵاتی یەكەمی پێشبڕكێی باشترین راپۆرت وەردەگرێت

گەرمیان/ 10ـی كانونی یەكەمی 2022/ عەمار عەزیز وەك ئامادەكاری بەدواداچونێكی (كەركوك ناو) خەڵاتی یەكەمی پێشبڕكێی باشترین راپۆرتی پەیوەست بە مافەكانی مرۆڤی وەرگرت فۆتۆ: كەركوك ناو

كەركوك ناو

بەدواداچونێكی ماڵپەڕی (كەركوك ناو)، دەبێتە براوەی خەڵاتی یەكەم لەنێو چەندین بابەتی دیكەی رۆژنامەوانیدا، ئەوەش لە پێشبڕكێی ساڵانەی رادیۆی دەنگ بۆ باشترین راپۆرتی پەیوەست بە مافەكانی مرۆڤ.

پێشبڕكێیەكە تایبەت بوو بە باشترین راپۆرتە رۆژنامەوانییەكانی پەیوەست بە مافەكانی مرۆڤ لە ساڵی 2022ـدا، دوای هەڵسەنگاندنی دەیان بابەتی پێشكەشكراو لەلایەن رۆژنامەنوسانەوە، دوانیوەڕۆی ئەمڕۆ شەممە 10ـی كانونی یه‌كه‌م لە مەراسیمێكدا لە قەزای كەلار؛ براوەكانی یەكەم، دووەم ‌و سێیەم خەڵاتكران.

خەڵاتی یەكەمی پێشبڕكێ درا بە عەمار عەزیز، ئامادەكاری بەدواداچونی (ژینا و دایكی باجی هەڵە و فێڵ دەدەن؛ چۆن بێ ناسنامەیی كچێكی شەش ساڵان لە خوێندن بێبەشدەكات) كە ئاداری ئەمساڵ لە ماڵپەڕی (كەركوك ناو) بڵاوكراوەتەوە.

ئەو بەدواداچونە گێڕانەوەی چیرۆكی كچە منداڵێكی ئاوارەیە، كە لەبەر بێ ناسنامەیی لە خوێندن بێبەش بووە و دایكیشی لە دۆخێكی دەرونی خراپدا ژیان بەڕێدەكات، بەهۆی ئەوەی كچەكەی بێ مارەبڕین هێناوەتە دونیاوە.

خەڵاتی دوەمی پێشبڕكێیەكە، بۆ ئاران نەجات بوو بە بابەتی (خانەی نەوجەوانان؛ روناكی خەمی بێسەرپەرشتانی شار) لە ماڵپەڕی خەندان.

هەر لەو پێشبڕكێیەدا خەڵاتی سێیەم بە فازڵ رەفعەت بەخشرا بۆ راپۆرتی (مروارییەك لەناو قوڕ و لیتەی ژیاندا) لە درەومیدیا.

ڤیدیۆ: وتەی عەمار عەزیز لە مەراسیمی دابەشكردنی خەڵاتەكانی باشترین بابەتی رۆژنامەوانی پەیوەست بە مافەكانی مرۆڤ 

ئازاد عوسمان، بەڕێوەبەری رادیۆی دەنگ كە سەرپەرشتی پێشبڕكێیەكە دەكەن، لە مەراسیمەكەدا وتی ئەمساڵ 31 رۆژنامەنوس بە 31 راپۆرت لە دەزگا میدیاییەكانی ناوچە جیاوازەكانی هەرێمی كوردستانەوە بەشداربون، لەڕێی لیژنەیەكی سێ كەسی شارەزا و پسپۆڕی رۆژنامەوانی، هەڵسەنگاندن بۆ راپۆرتەكان كراوە و سێ براوە هەڵبژێردراون.

هەروەها رونیكردەوە كە كێبڕكێ یەكێكە لە پایە گرنگەكانی كاری رۆژنامەوانی بۆ هاندانی بەرهەمهێنانی بابەتی باش و پشتگیری رۆژنامەوانیی راستەقینە.

پێشبڕكێی رۆژنامەوانی مافەكانی مرۆڤ‌ حەوت ساڵە بەردەوامە و له‌مساڵدا لەو 31 رۆژنامەنوسەی بەشداربون؛ سەدا 61ـیان لە رەگەزی نێر و سەدا 39ـیان لە رەگەزی مێ بون، سەدا 55ـی راپۆرت و بەدواداچونەكانیش نوسراو بون و سەدا 45ـیان راپۆرتی ڤیدیۆیی بون.

پیشبڕكێیەكە لەلایەن رادیۆی دەنگ ـ رادیۆیەكی سەربەخۆیە لە شاری كەلارـ بە پاڵپشتی سندوقی نیشتیمانی بۆ پاڵپشتی دیموكراسیی NED رێكخرابوو، كە دامەزراوەیەكی قازانج نەویستە و ساڵی  1983 دامەزراوە، ئامانجی سەرەكی گەشەپێدانی دیموكراسییە لە سەرتاسەری جیهاندا.

پێشتریش راپۆرت و بەدواداچونەكانی پەیامنێرانی (كەركوك ناو) بۆ ساڵانی 2017، 2019 و 2020 و 2021 توانیویانە ببنە براوەی خەڵاتەكانی یەكەم تا سێیەم، له‌ هه‌مان پێشبڕكێی باشترین راپۆرتەكانی پەیوەست بە مافەكانی مرۆڤ.

peshbrke amar 2022 (1)-1
گەرمیان/ 10ـی كانونی یەكەمی 2022/ مەراسیمی دابەشكردنی خەڵاتەكانی پێشبڕكێی رادیۆی دەنگ بۆ باشترین راپۆرتی پەیوەست بە مافەكانی مرۆڤ فۆتۆ: كەركوك ناو

ماڵپەڕی (كەركوك ناو)، لە ساڵی 2020ـیشدا توانی خەڵاتی باشترین راگەیاندنی گەشەکردوو بەدەستبهێنێت، لە پێشبڕكێیەكی رێكخراوی ئینتەرنیوز-ـی نێودەوڵەتی بۆ ئەو دەزگا راگەیاندنانەی عیراق، كە بایەخیان بە روماڵی پرسەکانی ژن و پرسە جێندەرییەکانی کۆمەڵگە داوە.

(كەركوك ناو) ماڵپەڕێكی ئەلكترۆنیی هەواڵییە، بایەخ بە بڵاوكردنەوەی ئەو رووداو و بابەتانە دەدات كە لە سنووری جوگرافیی "ناوچەی جێناكۆك"ـدا ڕوودەدەن، یان پەیوەندییان بەو سنورە جوگرافییەوە هەیە، ئەمەش بە ئاڕاستەی پێكەوەژیانی ئاشتییانە لەم سنورەدا و ئاسانی دەستڕاگەیشتن بە زانیاریی.

لە ساڵی 2011ـدا ماڵپەڕی (كەركوك ناو) دامەزراوە و بابەتەكانی بە چوار زمانی عەرەبی، كوردی، توركمانی‌ و ئینگلیزی بڵاودەكاتەوە.

  • FB
  • Instagram
  • Twitter
  • YT