ژمارەیەك لە جوتیارانی گوندی مەنسوی داقوق، ناڕەزایین دژی هەڵكەندنی بیری ئاو لەسەر زەوییە كشتوكاڵییەكانی ناوچەكانیان، كە ساڵانێكە بەهۆی ناكۆكی لەسەر خاوەندارێتییان سڕ كراوە و كاری تێدا ناكرێت.
ئەو ناڕەزاییە دوای ئەوەهات، ژمارەیەك جوتیار دەستیانكردووە بە لێدانی بیری ئاو لەسەر زەوییە كشتوكاڵییە بەراوەكانی نێوان هەردوو گوندی مەنسور و عەسرێ لە قەزای داقوق (باشوری كەركوك)، ئەوەش "بەدەر لە رێنمایی و رێكارە یاساییەكان"ـی حكومەت.
"ئەو زەوییە کشتوکاڵییانەی بیریان تیادا لێدراوە ماوەی هەشت ساڵە كاری كشتوكاڵییان تێدا ناكرێت، تەجمید كراوە چونكە كێشەی لەسەرە لە نێوان جوتیارانی كورد و عەرەب، هەردولاش لەوبارەیەوە بەڵێننامەیان لە دادگا پڕكردۆتەوە، بەڵام جوتیارانی عەرەب بەڵێننامەكەیان شكاند" بەوتەی محەمەد ئیبراهيم، ئەنجومەنی گوندی مەنسور بۆ (كەركوك ناو) كە جەختیكردەوە وەكو كورد خۆیان بە خاوەنی راستەقینەی زەوییەكان دەزانن.
زەوییەكانی ئەو ناوچەیە كە كێشەیان لەسەرە روبەری هەزار و 750 دۆنمە، بەشێكە لەو 600 هەزار دۆنمەی لە ناوچەی هەفتەغار و سنورەكانی تری داقوق كە كێشەی خاوەندارێتیان هەیە و یەكلاییكردنەوەی بەستراوەتەوە بە جێبەجێكردنی ماددەی 140ی دەستوری عیراق، كە هێشتا ئەو ماددە دەستورییە جێبەجێنەكراوە.
جوتیارانی كورد لە هەوڵدان سكاڵا دژی لێدانی بیر لە زەوییەكاندا تۆماربكەن. لەوبارەیەوە (كەركوك ناو) هەوڵیدا لێدوانی جوتیارانی عەرەب لەو ناوچەكە وەربگرێت بەڵام بێ ئاكام بوو.
سەرچاوەیەك لە فەرمانگەی سەرچاوەكانی ئاو لە كەركوك بە (كەركوك ناو)ـی وت هەر كەسێك بەدەر لە رێنمایی و رێكارەكان بیری ئاو لێبدات، ئەوا روبەڕوی سزای بەندكردن دەبێتەوە و دەستدەگرن بەسەر ئامێر و كەرەستەكانی هەڵكەندی بیرەكەدا.
وەك ئەو رونیكردەوە، لێدانی بیر لە زەوی كشتوكاڵیدا قەدەغە كراوە، ئەگەر بەراو بێت، بۆ زەوی دێمی دوو مەرجی هەیە؛ یەكەمیان وەرگرتنی رەزامەندی كشتوكاڵ و دوەمیان رەزامەندی سەرچاوەكانی ئاو، دواتر تیمی ئەندازەی سەرچاوەكانی ئاو بە ئامێری خۆیان بیرەكە لێدەدەن.
پێشتر و زیاتر لە جارێك ناكۆكی و ئاڵۆزی لە نێوان جوتیارانی ناوچەكەدا سەریهەڵداوە، بەهۆی بە هەڵپەسێراوی مانەوەی خاوەندارێتی زەوییە كشتوكاڵییەكان. هەرچەندە بەپێی یاسای گەڕاندنەوەی زەوی بۆ خاوەنە رەسەنەكانیان، دەبێت لانیكەم 300 هەزار دۆنم زەوی لە پارێزگای كەركوك دوای زیاتر لە 50 ساڵ بە بڕیاری پەرلەمانی عیراق بۆ خاوەنە رەسەنەكانیان بگەڕێنرێنەوە.
