له‌گه‌ڵ بیستنی هه‌واڵی دۆزینه‌وه‌ی ته‌رمه‌كاندا، به‌هیه ره‌سوڵی 50 ساڵ وه‌ك هه‌ر جارێكیتر زوو گه‌یشته به‌ر ده‌رگای پزیشكی دادوه‌ری، به ئومێدی ئه‌وه‌ی له‌نێو ته‌رمه‌كاندا كوڕه‌كه‌ی ئه‌ویشی تێدابێت.
نزیكه‌ی شه‌ش مانگه، ئه‌و ژنه موسڵاوییه هه‌مان رێگه ده‌گرێته‌به‌ر و بێ ئه‌وه‌ی به كوڕه‌كه‌ی شادبێته‌وه، به برینێكی كولاوه‌وه ده‌گه‌ڕێته‌وه بۆ ماڵ.
"كاتێك بیستن ته‌رم تر دۆزراوه‌ته‌وه له روداوی نقومبونی به‌له‌مه‌كه‌دا، به خێراپی خۆم گه‌یانده فه‌رمانده‌ی پزیشكی دادوه‌ری و له‌به‌رده‌م ده‌رگاكه‌دا چاوه‌ڕێی ئه‌نجامی پشكنینه‌كانم ده‌كرد، به‌ڵكو كوڕه‌كه‌ی منیش له‌نێو ته‌رمه‌كاندا بێت" به‌هیه بۆ (كه‌ركوك ناو) وای وت.
كوڕه‌كه‌ی به‌هیه، ته‌مه‌نی 24 ساڵ و ناوی محه‌مه‌د بوو، دوایینجار كاتژمێر 1ی دوانیوه‌ڕۆی رۆژی روداوه‌كه‌وه، هه‌واڵی دایكی پرسی و بۆ به‌سه‌ربردنی جه‌ژن و شادی وه‌زری به‌هار له‌گه‌ڵ هاوڕێیه‌كانیدا چووه ناوچه‌ی غابات له موسڵ، له‌وكاته‌وه چیتر دایك و كوڕ یه‌كترییان نه‌بینییه‌وه.
"دوای چه‌ند كاتژمێرێك له رۆیشتنی، هه‌واڵم له‌ده‌ستدانی كوڕه‌كه‌م پێگه‌یشت كه له‌سه‌ر به‌له‌مه‌كه بووه" به‌هیه ده‌ڵێت؛ له‌وكاته‌وه ته‌رمه‌كه‌ی دیارنیه، "ئه‌وه‌ش ئه‌وه‌نده‌ی تر ئازاره‌كانی زیاتر كردوم، ئه‌گه‌ر گۆڕێكی هه‌بوایه گه‌ڕان و بیركردنه‌وه‌ی زۆرم نه‌ده‌ما".
محه‌مه‌دی كوڕی به‌هیه، له 21ی ئازاری 2019دا له دورگه‌یه‌كی گه‌شتیاری له موسڵ، به‌هۆی نقومبونی به‌له‌مێكه‌وه له روباری دیجله، له‌گه‌ڵ ژماره‌یه‌كی زۆر هاوڵاتی له نێویاندا ژن و منداڵ خنكا، دوایین جار له رۆژانی رابردودا بوو، كاتێك ژماره‌یه‌ك ته‌رمی ئه‌و روداوه دۆزرایه‌وه.
حه‌سه‌ن ره‌ئوف، به‌ڕێوه‌به‌ری پزیشكی دادوه‌ری له شاری موسڵ به (كه‌ركوك ناو)ی وت "چوارشه‌ممه 5ی ئه‌یلول، 10 ته‌رم له نزیكی حه‌مام عه‌لیل له باشوری موسڵ دۆزراوه‌ته‌وه، ئه‌وه‌ش له‌هه‌ڵمه‌تێكی گه‌ڕانی تیمه‌كانی مه‌له‌وانی له روباری دیجله".
"ته‌رمه‌كان دوای پشكنینی دی ئێن ئه‌ی راده‌ستی كه‌سوكاریان ده‌كرێنه‌وه"، به‌وته‌ی ره‌ئوف تائێستا ته‌رمی 128 كه‌س له خنكاوه‌كانی ئه‌و روداوه دۆزراونه‌ته‌وه، كاره‌كانیش بۆ دۆزینه‌وه‌ی ئه‌وانیتر به‌رده‌وامی هه‌یه.
به‌پێی گرته‌یه‌كی ڤیدیۆیی كه سه‌ره‌تای سه‌ركه‌وتنی گه‌شتیاران بۆ سه‌ر به‌له‌مه‌كه نیشانده‌دات له دورگه‌ی گه‌شتیاری ئوم ره‌بیعه‌ین له شاری موسڵ، 287 كه‌س سه‌رده‌كه‌ون، زۆرینه ژن و منداڵن، ته‌نیا نزیكه‌ی 60 كه‌س له‌و رۆژه‌دا له خنكان رزگاركراون.
سه‌رچاوه‌یه‌ك له به‌ڕێوه‌به‌رایه‌تی به‌رگری شارستانی موسڵ بۆ (كه‌ركوك ناو) ئاشكرایكرد، ئه‌و كه‌سانه‌ی له روداوی نقومبونی به‌له‌مه‌كه‌دا وه‌ك بێسه‌روشوێن به‌فه‌رمی تۆماركراون، گه‌یشتۆته 71 كه‌س له ژن، منداڵ و پیاو.
"به‌پێی یاساش هه‌ر كه‌سێكی بێسه‌روشوێن وه‌ك كۆچكردوو هه‌ژمارناكرێت و به‌ڵگه‌نامه‌ی مردن بۆ كه‌سوكاری ناكرێت ئه‌گه‌ر ته‌رمی نه‌بێت" به‌پێی سه‌رچاوه‌كه؛ قوربانیانی روداوه‌كه ئه‌گه‌ر ته‌رمه‌كانیان نه‌دۆزرێته‌وه ئه‌وا هه‌ر به بێسه‌روشوێن ده‌مێننه‌وه.
پەرلەمانی عیراق هەرچەندە بڕیاریدا بە قەره‌بوكردنەوەی كەسوكاری قوربانیان، بەڵام هێشتا هیچ خێزانێك قەرەبونەكراونەتەوە.
حاجی عه‌بدولجه‌بار عاسم، نیگه‌رانه له‌وه‌ی نه‌یتوانیووه مافی كوڕ و هاوسه‌ر و منداڵه‌كانیان وه‌ربگرێته‌وه، كه له‌و رووداوه‌دا خنكان.
"ته‌رمی كوڕه‌كه‌م؛ هانی، ئێواره‌ی هه‌مان رۆژی روداوه‌كه دۆزرایه‌وه و بۆ رۆژی دواتر، ته‌رمی هاوسه‌ره‌كه‌یی و كچه‌كه‌ی مریه‌م، دوای دوو بۆ سێ رۆژیش ته‌رمی سه‌عیدی كوڕه‌زاكه‌م دۆزرایه‌وه".
عه‌بدولجه‌بار به (كه‌ركوك ناو)ی وت "كوڕه‌كه‌م و خێزانه‌كه‌ی بوون به قوربانی گه‌نده‌ڵی و تائێستاش مافه شه‌رعییه‌كانیانمان وه‌رنه‌گرتووه، هه‌ركاتێكیش سه‌ردانی لایه‌نی په‌یوه‌ندیدار ده‌كه‌ین داوای كۆمه‌ڵێك نوسراوی ره‌سمی ده‌كه‌ن، كه به‌ده‌ستهێنانیان كات و خه‌رجی زۆری ده‌وێت".
باوكی هانی داوای سزادانی ئه‌وانه‌ی كرد له پشت نقومبونی به‌له‌مه‌كه‌وه بون، به بڕوای ئه‌و، ئه‌و رێكاره باشترین قه‌ره‌بووه بۆ كه‌سوكاری قوربانیانی روداوه‌كه‌وه.
روداوەكە، ئه‌وكات ناڕەزایی خۆپیشاندانی فراوان لە موسڵ بەدواداهات و ماتەمی گشتی لە عیراق راگەیەنرا، بوو به هۆكاری چه‌ندین گۆڕانكاری ئیداری و ئه‌منیش له سنوره‌كه‌دا، له نێویاندا لابردنی پارێزگاری نه‌ینه‌وا و زۆربه‌ی لێپرسراوانی تری پارێزگاكه.
ئه‌نجومه‌نی پارێزگای نه‌ینه‌وا، له نیسانی ئه‌مساڵدا، پێنج لێپرسراوی باڵای موسڵ وه‌ك كه‌مته‌رخه‌م له دۆسیه‌ی نقومبونی به‌له‌مه گه‌شتیارییه‌كه‌دا راگه‌یاند، سه‌رباری پێكهێنانی چه‌ندین لیژنه‌ی تری لێكۆڵینه‌وه و ده‌ستگیركردنی خاوه‌نی دورگه گه‌شتیارییه‌كه، هێشتا ده‌ره‌نجامی كۆتایی دۆسیه‌كه و دادگاییه‌كه‌ی به نادیاری ماوه‌ته‌وه.
